BAGUIO CITY – Pimmusay ti maysa a pulis kalpasan a maatap nga aksidente a napaltuganna ti mugingna sadiay Lacub, Abra itay alauna ti parbangon.
Nabigbig daytoy a ni Police Corporal Ariel Barona Billedo, 29-anyos, residente ti Banacao, Bangued, Abra ken agdama a nakadesignar iti Lacub Municipal Police Station.
Maibasar iti report ti Lacub MPS, nadanun dagiti dua a pulis ni Billedo iti boarding house-da a nakatugaw.
Sigun kadagiti dua a pulis, iggem ni Billedo ti paltogna ken imbagada kenkuana nga idulinan daytoy.
Nupay kasta, idi ikkaten ni Billedo ti slingbagna ket maatap nga aksidente a nakalbitna ti paltog a timmama iti mugingna.
Narekober iti crime scene ti caliber 45, magazine nga addaan ti lima a bala ken maysa a basyo ti bala.
Naulila ti biktima ti dua nga annakna.
Impabiang metten ti ina ti biktima ti napasamak nga insidente iti pulisya ken iti namarsua.
Sigun met kenni PCol. Maly Cula, dadaulo ti Abra PPO, agtultuloy ti imbestigasyonda iti napasamak nga insidente.
