Naangay ti pormal nga evaluation wenno post assessment iti napasamak a 2025 National ken local elections iti rehiyon Cordillera iti Regional Joint Security Control Center (RJSCC) iti siudad ti Baguio idi kalman.
Iti panakiuman ti Bombo Radyo kenni Atty. Julius Torres, Regional Director ti Commission on Elections Cordillera, kinunana nga immunan a naipatungpal ti mini post evaluation sadiay Camp Dangwa, La Trinidad idi Mayo 27, 2025.
Maibasar iti assessment dagitoy, generally peaceful ti rehiyon Cordillera no maipapan iti peace and order gapu ta awan ti failure a napasamak wenno amin a presinto iti rehiyon ket nagpabotos.
Daytoy ket iti laksid dagiti shooting incidents sadiay Abra.
Sigun kenni Atty. Torres, iti laksid dagiti problema a napasaran kadagiti automated counting machines, daytoy ket minimal laeng kas iti problema iti scanner dagiti makina.
Para kadagiti nadadael a makina dagus met dagitoy a nasukatan rason a nakabotos ladta dagiti botante.
Iti sabali a bangir, kinuna ni Atty. Torres a kadagiti sumarsaruno nga eleksyon ket napateg ti planning tapno dagus a marisut dagiti anyaman a problema a mapasaran.
Innayon ti Regional Director a tarigagayna a mas naparpatak ti agbalin a transmittal dagiti reulta inton sumaruno tapno dagus a maiprklama dagiti nangabak.
Malaksid iti dayta, mangnamnama pay daytoy a mas paingetan pay ti Philippine National Police ti kampanya dagitoy maipapan iti loose firearms sadiay Abra tapno maliklikan dagiti ado nga insidente ti shooting incidents.
