--Ads--
BAGUIO CITY – Ngimmato ti presyo dagiti commercial a bagas iti merkado publiko ti siudad ti Baguio.
Sigun kenni John Paul Peralta, panakabagi ti Rice Section ti Baguio City Public Market, in-inot a ngimmato ti presyo ti commercial rice bagas gapu iti napasaran a panagtudtudo idi napalabas a bulan.
Kinunana a nangina paylaeng ti bagas gaputa nabayag pay ti panag-apit.
Nupay kasta, impanamnama ni Peralta nga uray ngimmina ti bagas ket umdas met latta ti suplay nga agtataud iti sabali a lugar.
Impettengna pay nga awan ti pagdanagan dagiti consumers gaputa saan nga agbayag ti agdama a presyo dagiti bagas.
Inlawlawag met nga ilaklakoda iti nababa a gatad dagiti siguden nga stocks dagitoy.
