Awan ti napasamak a prisoner swap iti nagbaetan ti pagilian a Pilipinas ken Indonesia kagiddan ti panakaisubli ni Alice Guo iti pagilian.
Daytoy ti impakaamo ni President Ferdinand Marcos Jr. gapu ta awan ti opisyal a kiddaw ti pagilian nga Indonesia maipapan iti agbalin a kasukat a balud ni Guo para iti panakaideport daytoy.
Nu pay kasta, immuna a rinumwar dagiti nagduduma a pablaak a nasken ti panakaipatungpal ti prisoner swap ngem saan daytoy a naisayangkat gapu ta awan ti opisyal a kiddaw ti Indonesia.
Sigun kenni President Marcos Jr., babaen ti panagturongna sadiay Indonesia ket naaddaan daytoy iti gayyem rason a napartak ti nagbalin a kolaborasyon ti dua a pagilian para iti panakakemmeg ni Guo.
Maipalagip nga itay nabiit ket kinuna ni Department of Justice Secretary Jesus Crisspin Remulla a kiniddaw dagiti otoridad sadiay Indonesia ti prisoner swap nu sadino kasukat ti panaka-deport ni sigud a Bamban, Tarlac Mayor Alice Guo iti pagilian ket nasken ti panakaalada iti kustodiya ni Australian national a ni Gregor Johann Haas a wanted iti nasao a pagilian.
