BAGUIO CITY – Nangilatang iti pondo ti probinsial a gobierno ti Benguet para iti implementasion ti repopulation program a pagnumaran dagiti maikari a mannalon a naapektaran ti African Swine Fever.
Iti panakiuman ti Bombo Radyo Baguio, kinuna ni Provincial Veterinarian Dr. Miriam Tiongan a maipangruna iti nasao a programa dagiti mannalon kadagiti ASF-free a munisipyo ti Benguet tapno agbalin nga stable ti presyo ti karne ti baboy.
Inlawlawagna a limitado laeng ti mailatang a pondo para iti nasao a programa isut gapuna a nasken a dumalan iti nainget a proseso ti panakapili dagiti agbalin a benipisaryo.
Imbinglayna a mangipatungpalda ti assessment kadagiti maikari a mannalon sakbay nga irekomendarda iti maseknan a munisipyo agginga a dumanon iti provincial level.
Inyunay-unay met ni Dr. Tiongan a kasapulan a nakarehistro ti maseknan a mannalon iti Registry System for Basic Sectors in Agriculture (RSBSA) ti Department of Agriculture wenno iti registry ti provincial line data base information sytem tapno maipasigurado ti insurance dagitoy.
No makapasa ti mannalon iti naituding a kwalipikasion, maipaayan daytoy iti maysa gilt swine a mabalinen a paaduen daytoy.
Agnumar pay dagiti benipisaryo ti nagduduma a serbisyo ti veterinary office kas iti panakaisuro ti wagas tapno mamintinir ti biosecurity measures para iti kinatalged dagiti mapaado a taraken a baboy.
Babaen metlaeng ti nasao a programa, maprebentaran ti iseserrek ti ASF iti probinsia ken makatulong tapno mapaado ti suplay ti karne ti baboy ditoy lokalidad.
