Ipampannakel ti Bila, Bauko, Mountain Province ti produkto dagitoy a Ceramic Water Filter a naaramid manipud ti linang wenno clay.
Maus-usar daytoy kas alternatibo a mangdalus iti danom babaen iti panangsadatna kadagiti kontaminado a danum, tapnu mabalin daytoy a mainom.
Addaan ti nasao a produkto iti microfiltration nga agserserbi a pangsagat kadagiti contaminants kas iti microorganism, particles iti tap water, deep water, ken iti fresh water.
Sigun kenni Joy P. Banatawan, Administrative Assistant IV iti Public Employment Service Office wenno PESO, kasapulan a masadat ti danum agsipudta adu a pagtaudan ti danum ti nabellengan ti basura iti lugar dagitoy.
Inyunay-unay ti nasao nga opisial a mabalin a mainum ti danum a masala iti Ceramic Water Filter, kalpasan nga inaprobaran ti Bauko Rural Health Unit ken Department of Science and Technology (DOST) maibasar iti laboratories idi tawen 2014 ken 2019.
Impasigurado met ni Banatawan, a makatulong ti ceramic water filter agsipudta, nalaka daytoy nga awiten ken bumayag no idilig kadagiti dadduma a water filter.
Kabayatanna, kinuna ni Jovelyn Sacmaten, maysa kadagiti handicraft worker, a dakkel a tulong daytoy kadakuada agsipudta, naipaayan dagitoy iti panggedan.//via Febe Joy Molang, Local News Correspondent, Bauko Mt. Province
