BAGUIO CITY – Puntirya ti Regional Highway Patrol Unit (HPU) a kissayan ti bilang dagiti road crash incidents ditoy rehion Cordillera kasaruno ti agtultuloy a panagngato dagiti aksidente iti kalsada ditoy lokalidad.
Sigun kenni HPU Regional Chief Pol Lt. Col. Joe Wilson Denamarca, nangiyuswat dagitoy iti programa a mangtingiting iti kasasaad wenno kondisyon dagiti lugan nga agdaldaysat iti intero a rehion.
Inlawlawagna a dakkel a rason iti panakapataud dagiti aksidente ti saan nga umno a kondisyon dagiti lugan isu’t gapuna a mangipatungpalda iti nainget nga inspeksion kadagiti nagduduma a unit ti lugan.
Kinunana a babaen iti daytoy ket mapalagipan dagiti motorista seknan iti panangtarimaan ken panangsukatda kadagiti worn-out a pilid ti lugan dagitoy.
Kabayatana, dinakamat ni HPG Chief Operations Pol/Maj Peter Dapliyan a mamulta iti dumano iti P5,000 dagiti motorista nga addaan depekto ti parte dagiti lugan dagitoy ken otomatiko a manayonan iti P7,000 para iti saan a nannayas a panagmaneho dagitoy.
Nupay dinakamatna a saanda pay nga agtiliw kadagiti aglabsing iti pagalagadan, inyunay-unayna latta ti agipaayda laeng pay iti ballaag nangruna kadagiti maobserbaran a panagridam dagiti motorista nangruna kadagiti delikado a kalsada. (report ni Bombo Brigitte Marcasi)
