BAGUIO CITY – Agbirbiruk ken agisagsagana ti provincial government ti Benguet kadagiti pasdek wenno istruktura nga agserbi a containment wenno quarantine center ti probinsia.
Iti interview ti Bombo Radyo Baguio kenni Governor Melchor Diclas, kinunana a daytoy ket tapnu adda maaramat no ngumato unay ti bilang dagiti mabigbig a patients under investigation (PUIs) a ma-admit iti Benguet General Hospital (BeGH).
Sigun kenkuana, nakasagana latta ti BeGH a mangakomodar kadagiti COVID-19 patients ngem iti agdama ket adun dagiti agturturong sadiay a PUIs, pakairamanan dagiti agdama a naka-admit nga agarup 15.
Dinakamatna nga isimsimpadan ti provincial evacuation center sadiay Wangal ken kasarsaritada ti Benguet State University, maysa a hotel ken transient houses para iti panagbalin dagitoy a containment center.
Inlawlawagna a no umado dagiti PUIs iti BeGH ket maiyakar dagitoy, nangruna dagiti addaan ti mild symptoms ti COVID kas kadagiti saan unay a nasken a mai-dextrose ken mabantayan.
Kabayatanna, pagyamyamananna met dagiti nangidonar ken mangidondonar kadagiti personal protective equipment kas iti overall gowns kadagiti medical personnel a frontliners iti panakataming dagiti PUIs.
Nupay kasta, inaklonna a no bumayag ti sitwasyon ken umado dagiti COVID patients ket posible nga agkurang dagiti nasao nga equipment.
