BAGUIO CITY – Aw-awisen ti Public Order and Safety Division (POSD) ti publiko, nangruna dagiti kritikoda tapnu dumar-ay dagitoy iti maangay a public forum inton sumaruno a lawas.
Iti interview ti Bombo Radyo Baguio, kinuna ni POSD Deputy Chief Daryl Kim Longid nga inisyal a naituding a maangay ti nasao a public forum iti multi-purpose hall ti Baguio City Hall, mangrugi iti alas dies ti agsapa inton May 5, aldaw ti Miyerkoles.
Kinunana a kangrunaan a matalantan iti forum dagiti saludsod iti pudno a panggep, mandato ken dadduma a trabaho ti POSD.
Innayonna a babaen iti nasao a public forum ket sipupuso ken sipupudno a sungbatanda dagiti pakaseknan ti publiko, nangruna dagiti kritikoda malaksid a mangiparangda pay iti datus ken ebidensia dagiti trabaho nga ar-aramiden dagitoy.
Maipalagip a ti POSD ti enforcement arm ti Mayor’s Office ti siudad ti Baguio kadagiti nagduduma nga ordinansa ken linteg kas iti anti-illegal parking, anti-smoking ken anti-illegal pedling.
