Maaw-awis ti publiko nangruna dagiti agpamilya iti siudad iti Baguio a makipaset kadagiti naisagana nga aktibidad para iti makabulan a panakarambak ti Filipino Family Day.
Iti panakiuman ti Bombo Radyo kenni Councilor Elmer Datuin, Chairperson iti Committee on Social Services, Women and Urban Poor, adu nga aktibidad ti naisagana para iti Family Fair Day a maangay inton September 29, 2024.
Daytoy ket babaen iti panakitinnulong dagiti nagduduma nga ahensya iti gobyerno ken dagiti daduma pay a Non-Government Organization (NGO) partners iti siudad.
Maysa ti Family Fair Day kadagiti tampok para iti makabulan a selebrasyon a naituding a maangay iti Session Road ken iti Malcolm Square People’s Park.
Malaksid iti dayta, kinuna ni Datuin a maangay ti mass wedding nu sadino addan ti limapulo (50) a pre-selected couples a mabalin a maikallaysa babaen iti nadakamat nga programa iti agdama.
Mangnamnama met ti konsehal a babaen iti mass wedding ket ad-adda a maparegta pay dagiti agparis weno agassawa ti relasyonda para iti natibker a pamilya dagitoy.
Sumagmamano kadagiti napili a makipaset iti mass wedding ket dagiti live-in partners nga agtarigagay iti pormal a panagdenna.
Iti sabali a bangir, agpili ti maseknan a komite ti maysa a pamilya a mapadawayan kas Natatanging Pamilya a manamnama a mangibagi iti siudad ti Baguio iti regional ken nasyunal a lebel.
Maipalagip a nangrugi ti nominasyon kadagiti pamilya nga agtarigagay a makagun-od iti titulo idi napan a bulan nu sadino dagiti nainominar ket kasapulan a Filipino citizens ken residente iti siudad ti Baguio iti uneg ti sangapulo ket lima a tawen, masapol nga addaan dagitoy iti good moral character ken awanan iti criminal record.//Bombo Rob Dominguez
