BAGUIO CITY -Naragpaten ti COMELEC-Mountain Province ti puntiryada a bilang dagiti umili sadiay a maiparehistro kas botante iti mapaspasungadan a 2022 national and local elections.
Iti interview ti Bombo Radyo Baguio, kinuna ni Atty. Ricardo Lampac, Provincial Election Supervisor ti Mountain Province a lima ribo ti naituding a bingayda nga iparehistro ita a tawen manipud iti 24,200 a puntirya para iti entero a Cordillera.
Dinakamatna a no al-alaen iti datus dagitoy ket naragpaten ti COMELEC-Mountain Province ti puntiryada nga iparehistro gaputa nasuroken iti lima ribo ti naiparehistro dagitoy kadagiti napalpalabas a bulan.
Imbinglayna a gaputa saan a naipaspasidong ti Mountain Province iti ECQ ken Modified ECQ kadagiti napalpalabas a bulan nagtultuloy ti panagparehistro dagiti kayatda nga agbotos sadiay.
Sigun kenkuana, manipud May 2020 agingga ita a bulan ti Agosto ket nasuroken iti limaribo nga indibidual ti nairehistro iti nagduduma a munisipyo ti probinsia.
Dinayawna met dagiti umili sadiay Mountain Province gaputa saandan nga inuray ti panagpaso ti voter’s registration a naituding inton Setyembre 30 babaen iti nasapa a panagparehistro dagitoy.
Innayon pay ni Atty. Lampac a naisaysayangkat dagiti satellite registration kadagiti barangay sadiay Mountain Province nga awanan ti kaso ti COVID-19 iti las-ud ti 15 nga aldaw sakbay ti naituding a panagparehistro.
Nupay naragparen ti COMELEC-Mountain Province ti puntiryada a maiparehistro nga umili sadiay, kinuna ni Atty. Lampac nga akomodaren latta dagiti municipal offices ken provincial office ti komisyon dagiti agturong iti opisina dagitoy para iti nagduduma a transaksion kas iti panagparehistro, panagakar ti pagbotosan, panagbaliw iti detalye iti voter’s information ken panag-activate iti rekord dagitoy.
