BAGUIO CITY – Personal ita nga idauluan ti regional director ti Police Regional Office Cordillera (PRO-Cor) ti agtultuloy a pursuit operations nga issaysayangkat ti Philippine National Police ken Philippine Army kontra kadagiti rebelde a New People’s Army (NPA) sadiay Mountain Province.
Kasaruno daytoy ti ipupusay ti maysa a pulis ken panakadangran ti kadwana iti engkwentro dagiti pulis ken NPA sadiay Mt. Kapuwao, Bagnen Proper, Bauko idi March 29 ken iti ipupusay ti maysa pay a pulis ken panakadangran ti walo a kadwana kalpasan a bimtak ti improvised explosive device nga inkali dagiti agliblibas a rebelde bayat a kamkamaten dagitoy dagiti pulis iti bantay iti nagbaetan ti Tadian ken Bauko idi April 2.
Kagiddan iti daytoy, impasigurado ni PRO-Cor Regional Director Police Brigadier General Israel Ephraim Dickson a nakasagana dagiti pulis ken soldado iti kanito a rumaut manen dagiti rebelde nga NPA.
Kinunana nga awan ti rumbeng a pagdanagan dagiti umili ti Montañosa gaputa ipampangruna dagiti pulis ken soldado ti seguridad dagiti komunidad a nakapasamakan dagiti insidente.
Nainget met a balballakadanna dagiti turista ken dagiti residente iti saan dagitoy a panagturong kadagiti lugar a kinordon dagiti otoridad para metlaeng iti kinatalged dagitoy.
Mangnamnama pay ni Brigadier General Dickson a sumardengen ti engkwentro iti nagbaetan ti tropa ti gobyerno ken dagiti rebelde nga NPA sadiay Mt. Province ken iti rehiyon Cordillera.
Immuna iti daytoy, naisayangkat ti pre-emptive evacuation kadagiti sitio ti Cotcot, Luagan ken Malupa sadiay munisipyo ti Bauko gapu kadagiti nasao nga insidente.
