Manarimaan paylaeng ti imbestigasyon ti Bureau of Fire Protection (BFP)-Baguio nu anya ti rason iti napasamak nga uram sadiay Purok 5, Pinsao Proper, Baguio City.
Iti pannakiuman ti Bombo Radyo iti maysa a kameng ti Bureau of Fire Protection-Baguio, kinunanan a naideklara a fire out ti napasamak nga structural fire iti pasado alas onse ti rabii idi kalman.
Sigun kenkuana, ti nasao nga uram ket nangrugi iti pasado alas dies ti rabii.
Kinuna pay ti opisial a ti nauram a pasdek ket maysa a pagtaengan nga addaan iti dua a kadsaaran, ngem ti maikadua a kadsaaran laeng ti totally burned.
Nasayaat latta met ti kasasaad ti umuna a kadsaaran.
Gapu iti nasao nga uram, naapektaran ti dua a pamilya nga agnanaed sadiay.
Naamuan a naaramid iti light materials ti pagtaengan dagitoy.
Kabayatanna, agpalpalagip manen dagiti personnel ti BFP iti publiko a sukimaten ti wirings ti pagtaengan dagitoy ken liklikan ti “octopus connection” wenno ti panangi-plug kadagiti nagduduma nga extension cords iti maymaysa nga electrical outlet.
