BAGUIO CITY – Dakkel ti posibilidad nga iti Saint Vincent Gym sadiay Naguilian Road ditoy siudad ti Baguio a pakaisaysayangkatan ti training camp ti maysa a women’s volleyball team nga addaan walo a miembro a nagpositibo iti COVID-19.
Iti interview ti Bombo Radyo Baguio, imbinglay ni Mayor Benjamin Magalong a napaneknekan iti imbestigasyonda a nagtungpal dagiti volleyball players kadagiti health protocols kas maibasar iti video footages dagiti CCTV cameras iti pagdagdagusan dagitoy.
Nupay kasta, kinunana a posible a napasamak ti panakaimpeksion dagiti nasao a volleyball players iti mismo a pagsansanayanda a gym gaputa awan unay ti panag-disinfect iti venue ken maipalpalubos ti panagturong sadiay dagiti outsiders para iti fitness activities dagitoy.
Innayonna nga iti agdama ket natalged metten ti kasasaad dagiti nasao a volleyball players.
Immuna metten nga inaklon ti Perlas Spikers a maysa a professional women’s volleyball team nga agay-ay-ayam iti Premier Volleyball League (PVL) a miembro dagitoy dagiti nagpositibo iti COVID-19 ken insardengda pay ti panagsanay dagitoy.
Agleppas inton sumaruno a Martes, Hulyo 6 ti isolation dagiti nagpositibo iti COVID-19 a players ti Perlas ken maipasidong dagitoy iti sabali manen nga RT-PCR test.
Nangrugi ti panagsanayda ditoy siudad ti Baguio idi napalabas a bulan kas panagsaganada para iti umadani a PVL Open Conference
