BAGUIO CITY – Nakemmeg ti maysa kadagiti Regional Top Ten drug personality ti Cordillera iti buy-bust operation nga insayangkat dagiti otoridad iti deppaar ti Claver Private Road, partikular sadiay Callagdao, Bulanao Centro, Tabuk City, Kalinga itay laeng nabiit.
Nabigbig daytoy a ni Crenton Sumerbang Bagay, alyas Tonton, 32-anyos, naasawaan, minero ken residente ti Bulanao, Tabuk City, Kalinga.
Nakumpiskar kenkuana ti dua a pakete ti mapapati a shabu nga agdagsen ti agarup nasurok 1.6 grams, maysa a nakabalkot a napagango a bulbulong ti marijuana nga agdagsen ti agarup nasurok 3 grams ken ti cellphone nga inaramatna iti transaksion.
Narekober metlaeng iti ikot ni Bagay ti naaramat a buy-bust money.
Naisayangkat ti operasyon babaen iti nagtipon a pwersa ti nagduduma nga unit ti Kalinga Police Provincial Office, Police Regional Office Cordillera, Criminal Investigation and Detection Group 0 Kalinga ken Philippine Drug Enforcement Agency – Cordillera.
Naipila metten ti kaskenan a kaso a panaglabsing iti RA 9165 wenno iti Comprehensive Dangerous Drugs Act of 2002 kontra kenni Bagay.
