BAGUIO CITY -Pinaglibakan ti Public Order and Safety Division ti reklamo ti publiko a dagiti laeng motorcycle rider ti kabaelanda a sitaren ken tiliwen kabayatan ti implementasion ti anti-road obstruction iti Baguio City.
Iti panakiuman ti Bombo Radyo Baguio, kinuna ni Marvin Herera, dadaulo ti POSD, a patas ti pamay-anda kadagiti babassit ken dadakkel a lugan, kukua man daytoy ti ordinaryo wenno propesional a tao.
Impettengna nga adda latta dagiti madandanonanda nga agparparada kadagiti igid ti kalsada partikular dagiti kustomer ti repair ken motorcyle shops.
Impagetgetna a binagaandan dagiti establishemento a mangimuntarda wenno mangbigbigda iti bukkoda a parking space para kadagiti kustomerda tapno maliklikan ti panagparada dagitoy iti igid ti kalsada a sakop ti road right of way.
Malaksid iti daytoy, inyunay-unay ni Herera a nasken metlaeng a mangbigbig dagiti babbarangay iti bukkodda a pagparadaan gaputa naobserbaran nga adda dagiti opisial nga agparparada iti igid ti kalsada nga asideg iti barangay hall dagitoy.
Sigun pay kenni Herera, adda dagiti establishmento a naballaagan gapu iti saanda a panangdalus iti aglawlaw dagitoy.
Ipalpalagipna a mabalin a mamulta iti P5,000 dagiti agtagikua kadagiti establishmento a saan a mangmintinir iti nadalus a paraangan ken posible pay a maiparikep dagitoy.
