Nangipilan ita nga aldaw dagiti otoridad ti reklamo kontra kenni suspended Bamban Mayor Alice Guo ken dadduma pay para iti maatap a “human trafficking” nga adda pakainaiganna iti Philippine Offshore Gaming Operator (POGO) hub iday Bamban, Tarlac.
Iti reklamo nga impila ti Department of Justice (DOJ), ni Guo, sigud a Technology and Livelihood Resource Center (TLRC) deputy director general Dennis Cunanan, ken sangapulo ket dua nga opisial ken incorporators ket napilaan ti kaso a panaglabsing ti Sections 4 ken 6 iti Republic Act (RA) 9208 wenno Anti-Trafficking in Persons Act of 2003.
Karaman kadagiti makasuan ket ti maatap a business partner-na a ni Huang Zhiyang, a nagtalaw manipod China, kenni Zhang Ruijin ken Baoying Li, dua nga indibidual nga adda pakainaiganna iti kadakkelan a kaso a “money laundering” idiay Singapore.
Nakalanad iti reklamo ti nagan a Guo Hua Ping wenno ti nagan ni Guo iti Chinese.
Maipalagip a naipasidong iti imbestigasion ni Guo gapu iti maatap nga adda pakainaiganna iti sangapulo nga ektarya ti POGO compound a na-raid idi Marso gapu iti maatap nga iligal nga aktibidad karaman iti crypto ken love scams.
Ita laeng a bulan, nangipila ti Department of the Interior and Local Government ti kaso a “graft” kontra kenni Guo iti Office of the Ombudsman, a nangtignay ti pannakasuspindir kenkuana iti agingga innem a bulan.
