BAGUIO CITY – Maikalkalikagum ita iti panangiparang dagiti amin a non-Benguet residents iti negatibo a resulta ti RT-PCR test wenno vaccination card para kadagiti fully vaccinated kadagiti border checkpoint sakbayda a mapalubusan a makastrek iti masakupan ti probinsia.
Iti panakiuman ti Bombo Radyo Baguio, inkalintegan ni Governor Melchor Diclas a daytoy ket gaputa makitkitan ti panag-ado ti kaso ti COVID-19 iti probinsia ken adda payen ti pangta ti Delta variant ti nasao a sakit.
Kinunana a babaen iti nasao nga addang ket maliklikan ti panag-uneg ti Delta variant ti COVID-19 iti Benguet nupay nailistan ti nasao a variant iti siudad ti Baguio.
Impettengna a nasken nga agtitinnulong ti amin iti panagtungpal iti health protocols gaputa awan ti serbina ti panagirteng kadagiti border checkpoint no saan a mapasayaat ti sitwasyon dagiti kaso ti COVID-19 iti uneg ti probinsia.
