BAGUIO CITY – Inaprobaranen ti Land Transportation Franchising and Regulatory Land Transportation Franchising and Regulatory Board (LTFRB) ti resolusyon ti Benguet Provincial Board para para iti panakaimuntar ti tip box kadagiti parapubliko a jeep ken vans iti probinsia.
Sigun kenni Board Member Atty. Juan Nazzaro Jr., pinutar ken inaprobaranda ti nasao a resolusyon kalpasan a naobserbaranda a pagparparikutan dagiti driver dagiti parapubliko a jeep ken vans ti mapaspastrekan dagitoy iti panagbiaheda nangruna ta kagudua laengen iti kapasidad ti lugan ti mabalin a laonen dagitoy.
Sinakamatna a nagresulta ti nasao a sitwasyon iti panakalugi dagiti operators dagiti jeep ken vans a napalubusan nga agbiahe iti limitado a kapasidad.
Innayonna a kiniddawdan ti panakaipalubos ti donation box kadagiti parapasahero a jeep ngem saan a pinatgan ti LTFRB gapu iti nakita dagitoy nga insidente ti panag-abuso kadagiti drivers ti jeep ditoy siudad.
Inlawlawag ni Atty. Nazzaro nga iti tip box ket boluntaryo nga agipisok dagiti pasahero iti tulongda iti driver.
Inkalinteganna metlaeng a mas acceptable ti tip box no idilig iti donation box gaputa maipada ti serbisyo dagiti jeep kadagiti serbisyo kadagiti panganan.
Sigun pay kenkuana, maka-ammon ti operator ken driver ti maysa a jeep wenno van iti agbalin a bingay ti tunggal maysa manipud iti maur-or iti tip box ti naso a lugan.