BAGUIO CITY – Ur-urayen ti lokal a gobyerno ti Baguio ken ti Cebu Pacific ti resulta ti imbestigasyon nga isayangkat ti Civil Aeronautics Board iti panakaitantan ti flight ti Judo Team ti Baguio City a nakipaset iti Batang Pinoy 2019 National Finals sadiay Palawan idi napalabas a bulan.
Resulta daytoy ti taripnong iti nagbaetan ti Judo Team ken ti Cebu Pacific iti opisina ni Mayor Benjamin Magalong idi kalman.
Sigun kenni Mayor Magalong, nangipatungpal ti Cebu Pacific iti bukoda nga imbestigasiyon ken naduktalan a ti nasao nga airline ti nagkurang.
Ginandat ti Cebu Pacific a risuten daytoy babaen iti amicable settlement babaen iti panagbayadda.
Nupay kasta, nagkedked ni Mayor Magalong gaputa saan a naala ti kapanunutan ti Baguio Judo Team.
Sigun pay kenkuana, nasaysayaat nga urayenda ti resulta ti imbestigasiyon ti Civil Aeronautics Board sakbayda a mangipila iti kaso kontra iti nasao nga airline company.
Maipalagip a napilitan ti Baguio Judo Team nga immakar iti airline ken biahe paturong sadiay Palawan kalpasan a napawilanda nga agbiahe iti nai-book a flight-da iti Cebu Pacific iti baet a nasapa dagitoy.
Saanda a napaka-ammuan iti panagbaliw ti gate a pagluganan dagitoy ken nangngegda laengen ti panakaiyawag dagiti naganda iti last call.
Dagus a nagturongda iti baro a gate dagitoy ngem saandan a napastrek iti boarding gate iti baet a maiyaw-awag ti naganda iti ere ken nakasangbotda iti baro a gate dagitoy. (-with Bombo Charles Nikko Limon)
