BAGUIO CITY – Naituding a mangisayangkat ti munisipyo ti Bakun, Benguet iti ritwal wenno cañao a pakairamanan dagiti indigenous people wenno IPs dagitoy ken ti kompanya ti Hedcor Incorporated kagiddan paylaeng ti panakaisubli ti operasion dagiti planta iti nadakamat a kompanya.
Agyamyaman ni Mayor Bill Raymundo gaputa pinatganen ti HEDCOR ti itudtuding wenno kidkidawenda a bingay a sigud metlaeng a baybayanda iti sigud a kontra dagitoy.
Sigun kenkuana, nagtataripnong manen dagitoy idi Hulyo 28 ken napagnunumoanda ti panakaisubli ti operasion iti tallo a planta kalpasan a naiparikep daytoy iti 28 nga aldaw kalpasan a naiyulog ti cease and desist order wenno CDO daytoy manipod ti National Commission on Indigenous Peoples(NCIP).
Kinunana a nagbalin met a napintas ti resulta iti taripnong gaputa inkari met ti HEDCOR ti panangisanodda iti kaso nga inpilada iti lokal a gobierno ti Bakun.
Napagnumoanda nga agnayon ti benefit share ti municipio ken ti Bakun Indigenous Tribes Organization (BITO) leaders manipod iti voluntary MOA proposal ti HEDCOR ken ti pannakaipaay ti supplemental benefit ti BITO tapnu masungbatan ti pakaseknan ti LGU ken ti kiddaw ti IP community.
Maibasar iti supplemental agreemennt dagitoy, makaawat ti Bakun community iti P0.14 tunggal kilowatt hour manipod ti tallo a minihydro power plants kas mandatory share, pakairaman ti voluntary benefits iti sidong iti ER No.1-94 funds share ken projects manipod iti 2019 Free, prior and informed consent agreement ken ti napagnunumoanda a supplemental benefits idi July 28 ti agdama a tawen.
Gapu iti daytoy, pinagyamanan ni Mayor Raymundo ti pannakiballaet ti NCIP-Cordillera a nangtulong para iti pannakarisot ti nadakamat a pakaseknan.
Nagyaman metlaeng ti management ti nasao a kompanya kadagiti stakeholders ti Bakun LGU, ken ti BITO organization para iti suportada a maituloy ti operasion dagitoy ken ti NCIP ken komunidad a nangipaay iti pammalubos a maaddaan dagitoy iti diyalogo tapnu mapagsaritaan ti resolusion.
