Inlawlawag ni Department of Education Cordillera Administrative Region Director Estela P. Leon Cariño a saan a karaman ti Muay Thai kadagiti ay-ayam iti 2026 Cordillera Administrative Region Athletic Association (CARAA) Meet gapu ta saan daytoy a karaman iti official sports ti Palarong Pambansa.
Sigun kenni Cariño, narisgu ti nasao nga ay-ayam gapu ta maar-aramat iti daytoy ti panagdanog ken panagkugtar a mabalin a makadunor kadagiti studyante.
Ti Muay Thai ket maysa kadagiti nalalatak a combative sports a paglaingan metlaeng ti nalatak a Cordilleran fighter a ni Islay Erika Bomogao.
Nupay kasta, impanamnama ni Cariño a padasenda nga isingasing iti ahensya ti panakairaman ti Muay Thai nga official sport ti Palarong Pambansa.
Iti sabali a bangir,daduma met kadagiti combative sports a karaman iti Palarong Pambansa ket ti Arnis, Judo, Boxing, Kickboxing , taekwondo ken wrestling—tay-ak ti ay-ayam a paglaingan metlaeng dagiti atleta iti Cordillera.
Immuna metten a naiwaragawag nga opisyal a malukatan ti 2026 CARAA Meet inton February 22 ken naituding nga agleppas daytoy inton February 27.//Bombo Jerwin Aquino
