BAGUIO CITY – Inreklamo ti maysa a fish vendor dagiti kameng ti Public Order and Safety Division (POSD) gapu iti nagsasaruno a panangkumpiskarda iti lakona a lames iti intersection ti Tacay ken Quezon Hill Proper Barangay ditoy siudad ti Baguio.
Iti reklamo ni John Rey Teria nga indanunna ditoy Bombo Radyo Baguio, kinunana a tapos ti Hunyo a nangrugi nga agilako ti lames iti waiting shed sadiay ken immunan a natiliw gapu iti illegal peddling isut gapuna a nagala ti Business Clearance manipud iti Barangay Hall.
Dinakamatna nga utang ti impuonanna iti panagilakona ti lames iti nasao a disso.
Kinunana a nagsasaruno a tiniliw ken tinikitan daytoy dagiti kameng ti POSD sipud idi Agosto 10 agingga idi kalman, August 19 ken manipud Agosto 10 agingga Agosto 17 ket sinakana iti opisina ti POSD dagiti nakumpiskar a lakona ken nagbayad ti sangaribo tunggal panagsaka.
Nupay kasta, nakasangit daytoy gaputa idi Martes, Agosto 18 ket kinumpiskar dagiti personnel ti POSD dagiti lakona a lames nga aggatad ti P15,000.
Innayonna nga awan ti intedda a tiket kenkuana tapnu adda ti aramatenna a pangsaka ken saannan a nasaka dagiti tagilakona idi nagturong iti POSD.
Impetteng pay ni Teria nga improsesonan ti special permit-na ken naka-computerized daytoy sadiay City Hall ken naalana payen ti pammalubos ti agtagikua iti lote a paglaklakuanna. -razced/edtdND
Inlawlawag met ni POSD head Cyr Bagayao a sumagmamanon a daras a naballaagan ti nagreklamo a fish vendor sakbay a kinumpiskar dagiti personnel ti POSD dagiti lako daytoy.
Kinunana a ti disso a paglaklakuan ni Teria ket public land ken paset ti kalsada ti paglaklakuan daytoy.
Innayonna nga adda pay ti nangireklamo iti nasao a fish vendor gaputa mangituntunda daytoy ti rugit iti nasao a kalsada ken maap-apektaran ti paradaan a kaabay daytoy.
Dinakamatna metlang a mabalin latta a subliyen ti nagrekalmo dagiti lako daytoy a lames ngem gaputa perishable wenno nalaka a madadael ket impaimada dagitoy iti DSWD.
Sigun pay kenkuana, saanna a nai-legitimize ti special permit ni Teria iti licensing office sadiay City Hall. -razced/edtdND
