BAGUIO CITY – Maipampannakkel ita ti lokal a gobierno ti Sabangan, Mountain Province.
Daytoy ket gapu ta ti Sabangan-LGU ti kaunaan iti intero a Cordillera a nakakompleto iti distribusion ti Social Amelioration Program (SAP) assistance kadagiti benepisario.
Inlawlawag ni Municipal Local Government Operations Officer Caridad Basilio no kasano a naaramidda ti nasao a banag.
Kinunana nga addaan ti munisipio iti 1,716 4Ps ken 2,031 non-4Ps a benepisario ti SAP.
Kinunana pay a nangbukel ni Sabangan Mayor Marcial Lawilao iti uppat a teams a bukbuklen ti nagduduma a frontliners ken narugian ti payout idi April 14.
Kinunana a tunggal team ket agturong iti dua a barangay iti inaldaw ken ilepleppasda ti pannakaiwaras ti tulong iti las-ud laeng ti maysa nga aldaw.
Innayon ni Basilio a naiwaras dagiti cash assistance kadagiti naituding a lugar ken naipatungpal dagiti quarantine protocols kas iti panagisuot iti face mask ken panagobserbar iti social distancing.
Pinagyamanan ni Mayor Lawilao ti amin a timmulong iti dagus a pannakaiwaras ti tulong iti sidong ti SAP.
