Nadangran ti sangapulo ket maysa nga indibidual gapu iti napasamak a “turbulence” ti eroplano a Lufthansa manipod Buenos Aires a paturong idiay Frankfurt, Germany bayat ti panagdaliasatna iti rabaw ti Atlantic idi laeng kalman.
Sigun iti pannakangiwat ti Lufthansa, nagsagrap ti lima a pasaheros ken innem a “crew members” ti minor injuries. Dagos met a naipaayan ti atension dagiti nadangran kalpasan a nagdisso iti daga ti eroplano.
Addaan iti karga ti eroplano a tallo gasut dua pulo ket siam a pasahero ken sangapulo ket siam a tripulante.
Ti “turbulence” a napasamak ket ababa laeng ken napasamak daytoy iti intertropical convergence zone, sigun paylaeng iti nasao a kompania.
Maipalagip nga idi bulan ti Mayo, pimmusay ti maysa a pasahero gapu iti mapapati nga atake ti puso ken tallo pulo nga indibidual ti nadangran idi napasamak ti nakaro a “jolted” ti eroplano ti Singapore Airlines gapu iti “air pocket” iti rabaw ti Irrawaddy Basin idiay Myanmar.
