Narepatriate ti sangapulo ket siyam (19) nga Overseas Filipino Workers (OFW) ken tallo nga ubbing manipud Lebanon idi kalman kalpasan a kiniddaw dagitoy ti repatriation gapu iti agtultuloy a tensyon iti nagbaetan ti Israel ken militante a grupo dagiti Hamas.
Sigun iti Department of Migrant Workers (DMW), dagiti Pilipino a narepatriate wenno nagsubli iti pagilian ket simmangpet iti Ninoy Aquino International Airport Terminal 3 nu sadino tunggal Overseas Filipino Workers (OFW) ket naipaayan iti financial assistance a P10-K, komprehensibo a reintegration assistance ken job facilitation services.
Nangipaay met ti Department of Social Welfare and Development (DSWD) iti P20-K a livelihood assistance kadagitoy bayat a ti Technical Education and Skills Development Authority ket mangipaay iti skills training vouchers.
Kabayatanna, kinita ti Department of Health (DOH) ti salun-at dagiti Overseas Filipino Workers (OFW).
Maibasar iti datos ti Department of Migrant Workers (DMW), dumanon iti 1,085 nga Overseas Filipino Workers (OFW) ken 43 a dependents a Pilipino ti nagsubli iti pagilian manipud Lebanon gapu iti giyera a mapaspasamak.
