Nakasublin iti pagilian a Pilipinas dagiti sangapulo ket tallo a Pinay surrogate mothers manipud Cambodia itay agsapa kalpasan a naipaayan dagitoy iti royal pardon manipud iti sangsangoenda a kaso a human trafficking, sigun iti Department of Foreign Affairs.
Maipalagip nga idi Disyembre a dos iti agdama a tawen ket nakumbiktar dagiti Pinay surrogate mothers gapu iti panaglabsingda iti linteg a Suppression of Human Trafficking ken naituding a maikulongda iti uppat a tawen.
Ngem, gapu iti kiddaw ti embahada ti pagilian ken babaen iti endorsement ti Royal Government of Cambodia ket nawaya-wayaan dagitoy ken naipaay ti repatriationda.
Gapu iti dayta, nagyaman ti gobyerno ti pagilian iti Royal government ti Cambodia gapu iti humanitarian treatment dagitoy.
Kabayatanna, maysa kadagiti surrogate mother ket nagpasngayen idi Disyembre a kwatro iti agdama a tawen.
Nagpalagip met ti Department of Foreign Affairs kadagiti Pilipino a maiparit ti surrogacy sadiay Cambodia nu sadino dagiti aglabsing iti daytoy ket mabalin a maibalud iti las-od ti dua angingga baente a tawen.
