Pimmusay dagiti sangapulo nga indibidaul bayat a nastranded dagiti agarup 2 million gapu iti napasamak a pannakalayos dagiti aglawlaw gapu iti monsoon rains ken ti danum manipud iti karayan idiay India a nangitunda iti panaglayos idiay Bangladesh.
Maibasar iti report, natrapped dagiti umili sadiay pakairamanan dagiti 772, 000 nga ubbing no sadino kasapulan dagitoy ti dagus a tulong.
Sigun kenni United Nations International Children’s Emergency Fund Representative Sheldon Yett idiay Bangladesh, kasapulan ti dagus a tulong para kadagiti ubbing agsipud ta dagitoy dagiti kaaduan a nalaka a maapektaran, maipasango kadagiti nangato a peggad kas ti pannakalmes, malnutrisyon ken dadduma pay.
Iti TV footage makita ti nakaro a pannakalayos dagiti taltalon ken villages iti nasao a lugar.
Gapu iti daytoy, nagballaag ti weather state bureau sadiay tapno agannad dagiti umili.
Malaksid iti dayta, nangitunda metlaeng daytoy iti pannakadadael dagiti mulmula, ken dadduma pay.
Iti agdama pakabuklan iti 810 a government school ti nadadael bayat nga agarup 140 a community clinics ti nalayos.//Rose
