Tarigagay ti grupo dagiti mannursuro a ti koma a maisukat a mangidaulo iti Department of Education (DepEd) ket pudno a nasyonalista ken saan a miyembro ti aniaman a politican clan.
Kasaruno pailaeng daytoy ti panangiwaragawag ni Vice President Sara Duterte idi kalman nga aglusolos kas sektarya ti DepEd, epektibo inton Hulyo 19.
Sigun iti Teachers’ Dignity Coalition (TDC), ti koma pilien ni President Ferdinand Marcos Jr. a maisukat kas sekretarya ti DepEd ket saan a politiko wenno aktibo iti partisan politics.
Babaen iti daytoy ket tapno maipasigurado a mailiklik ken saanen a mairaman ti DepEd iti laban dagiti politiko.
Sigun kenni Banjo Basas, Chairperson ti TDC, namnamaenda a ti sumaruno metlaeng a sekretarya ti DepEd ket agtaud iti akademya wenno adda ti kapadasanna iti panagsuro iti parapubliko a pagadalan, nasken a maawatanna ti sitwasyon dagiti mannursuro ken adda ti nalawag a planona.
Sigun met iti Alliance of Concerned Teachers (ACT), ti sumaruno a dadaulo ti DepEd ket nasken a maysa a pudno a nasyonalista a mangbaliw iti sistema ti edukasyon iti pagilian.
Mamati ni Vlademir Quetua, Chairperson ti ACT a ti panaglusolos ni Vice President Sara Duterte kas sekretarya ti DepEd nga awanan ti umno a rason ket mangipakpakita iti kumarkaro a susik iti nagbaetan ti pamilya Marcos ken Duterte.
