BAGUIO CITY – Maituloy ita nga aldaw ti search and retrieval operation para iti panakabirok ti 16-anyos a lalaki a mapapati a naiyanod ken nalmes iti waig idiay Mamaga, Balili, La Trinidad, Benguet.
Iti panakiuman ti Bombo Radyo kenni PLt.Col. Benson Macli-ing, dadaulo ti La Trinidad Municipal Police Station, aramatenda ti rubber boat gapu ta nauneg ti Balili river.
Kinunana nga ipappapati-da ti panangsapol iti ubing kadwa-da ti National Bureau of Investigation, Bureau of Fire Protection, opisyales ti Brgy. Balili, volunteers ken daduma pay.
Innayon ni Macli-ing a nakikoordinar da metten iti Sablan Municipal Police Station.
Kinunana a saanda nga isardeng ti search and retrieval operation bayat nga awan ti tudo sakbay da nga agdesisyon nu ituloyda wenno isardengda babaen iti desisyon ti pamilya ti naanod a biktima.
Maipalagip a dandani dua a lawasaen a masapsapol ti biktima sipud napasamak ti nasao nga insidente idi Setyembre uno.
