Immabanten ti Senate Ethics Committee kalpasan a nakumpleto ti kasapulan a pirma iti internal rules ti Senado, a mangipaay iti dalan para iti panagtignay kadagiti naitantan a reklamo kontra iti sumagmamano a senador.
Sigun kenni Committee Chair Senator JV Ejercito, nakasaganan ti komite nga agakem iti pagrebbenganda kalpasan a naaprobaran ken nai-publish ti rules.
Dagiti nagpirma ket da Senador JV Ejercito, Kiko Pangilinan, Erwin Tulfo, Risa Hontiveros, Ping Lacson, ken Migz Zubiri.
Iti sidong iti baro nga addang, mabalin a repasuen iti komite dagiti reklamo, mangisayangkat iti panagdengngeg, ken agdesision kadagiti kaso.
Karaman kadagiti maad-adal a reklamo ket maipapan iti isyu kontra kenni Senator Ronald dela Rosa seknan iti nabayag a panag-absent daytoy iti sesyon iti Senado.
Sigun kenni Ejercito, manamnama a maipatungpal ti sumaruno a panagtaripnong inton Abril 28 para iti panangsukimat kadagiti kaso, kalpasan a nai-publish dagiti pagalagadan.
