Impeksa ni Senate Minority Leader Aquilino “Koko” Pimentel III a kasla agang-angaw ni Vice President Sara Duterte iti panangdutokna iti bukodna a bagi kas “designated survivor” tapno saan daytoy a makipaset iti umadanin nga State of the Nations Address ni President Ferdinand Marcos Jr.
Kinuna ni Pimentel III a nagbalin nga informal ni Duterte kalpasan ti panagresignna kadagiti nagduduma a government positionsna kas iti Secretary ti Department of Education.
Innayon pay ti nasao a senador a saan met a kasapulan nga ipakaamo ni Duterte a daytoy ti “designated survivor” gapu ta talaga a daytoy ti naituding nga agbalin a succesor.
Maibasar iti 1987 Philippine Constitution a nu pimmusay wenno nagbalin a disabled ti Presidente ti pagilian, ti agbalin a succesor ket ti Vice President.
Ngem, nu saan a kabaelan ti Vice President nga agakem iti nasao a posisyon ket maipasa daytoy iti Senate President wenno iti House Speaker.
Iti sabali a bangir, kinuna dagiti daduma a senator a saanda a naapektaran iti panangdutok ni Duterte iti bagina tapno laeng saan a makipaset iti State of the Nation Address.
