BAGUIO CITY – Mangituding ti COMELEC-Baguio iti serye ti konsultasyon kadagiti amin a nangipila ti Certificate of Candidacy ditoy siudad, pakairamanan dagiti barangay officials para iti panangilawlawagda kadagitoy iti COMELEC Resolution No. 10730 ken iti COMELEC Resolution No. 10732.
Iti interview ti Bombo Radyo Baguio, inlawlawag ni City Election Officer Atty. John Paul Martin a ti Resolution No. 10730 ket para iti implementasyon ti Republic Act No. 9006 wenno ti Fair Election Act bayat a ti Resolution No. 10732 ket nangilanad kadagiti pagalagadan iti amin a nagduduma nga aktibidad ti in-person campaigns.
Kinunana a babaen iti daytoy ket malawlawagan dagiti agkandidato kadagiti mabalin ken maiparit nga aramid kabayatan ti panagkampanya para iti eleksion inton sumaruno a tawen.
Sigun kenkuana, naisangsangayan ti May 2022 National and Local Elections gaputa adda paylaeng ti pandemya gapu iti COVID-19 ken saan a mabalin a maaramid dagiti sigud nga aktibidad ti panagkampanya.
Innayonna a kasapulan a kataripnongna dagiti kandidato iti lokalidad tapnu malawlawagan dagitoy iti dua a resolusyon ken saanda a mariro kadagitoy.
Imbinglayna a ti Resolution No. 10730 ti mangsaksakop iti panagkampanya nga awan ti presensia ti kandidato ngem ketdi, babaen iti poster, streamer, iti social media wenno online ken iti broadcast media.
Saksakupen met ti Resolution No. 10732 dagiti pagalagadan iti panagkampanya nga adda a mismo ti presensia ti kandidato kas iti rally, caucus, miting de avance ken dadduma pay nga adda ti physical contact.
Inyunay-unay ni Atty. Martin a napateg ti akem dagiti barangay officials, barangay tanods ken BHERTs gapouta dagitoy ti madutukan a mangiwanwan iti panagtungpal daigti kandidato kadagiti naipaulog a pagalagadan kabayatan ti panagkampanya.
Inlawlawagna pay a nasken nga agala iti permit manipud iti COMELEC dagiti kandidato a mangisayangkat ti in-person campaining nga adda ti maurnong a tattao bayat a nasken a paka-ammuanda ti komisyon no mangisayangkat dagitoy iti panagbisita kadagiti mismo a pagtaengan dagiti botante.
