Naipaayan dagiti sangapulo ket maysa nga employers pakairamanan dagiti business establishments dagitoy iti show cause order sadiay La Trinidad,Benguet gapu iti panaglabsingda iti public act 11199 social security act of 2018 wenno ti saanda a panagbayad ti Social Security System (SSS) contribution dagiti empleyado-da.
Iti interview ti Bombo Radyo kenni Christian Andrew Rillorta, Regional Communication Officer-SSS Luzon North 1 Division, kinunana a dagiti siyam nga employers manipud kadagiti sangapulo nga employers ket saan a nakarehistro dagiti business establishments dagitoy, bayat a dagiti dua met nga employer ket nabigbig kas non remittance wenno saan a nagbaybayad ti Social Security System (SSS) contribution dagiti empleyado-da.
Sigun kenni Rillorta,naammuanda daytoy nga insidente bayat ti raise campaign dagitoy,bayat nga adda metlaeng dagiti sumagmamano nga empleyado dagiti nadakamat nga establishments a nagturong iti opisina-da.
Gapu iti dayta,naipaayan dagitoy iti show cause order, tapno agturong dagitoy iti nasao nga opisina tapno ilawlawagda dagiti rason ti panaglabsing dagitoy.
Kinuna ni Rillorta, nga adda met dagiti maipaay a programa tapno matulungan dagiti nasao nga employer a makabayad kadagiti saanda a binaybayadan.
Kabayatanna, maipalagip a dagiti matakuatan nga aglabsing iti nasao a linteg ket mabalin a maibalud iti agarup innem a tawen agingga dose a tawen, maipaayan pay daytoy ti multa a P5,000 agingga P20,000.
Malaksid iti dayta, maipaayan metlaeng dagiti aglabsing iti penalty mainaig iti kaso a nilabsing dagitoy.
Iti agdama,agtultuloy latta ti raise campaign ti nasao nga opisina tapno masigurado ti pagsayaatan dagiti empleyado,employers ken dadduma pay.//Rosemarie Bulsao
