Maarestar ken ibalud manen iti House of Representative ni sigud a Presidential Spokesperson Harry Roque, kalpasan a nacite in contempt iti Quad Committee gapu iti saanna a panangisubmitir kadagiti dokumento ti kinabaknang ti pamiliana ken ti saanna panakipaset iti hearing idi Huebes, September 12, 2024.
Inaprobaran ni Surigao del Norte Representative Robert Ace Barbers, ti mangidadaulo iti maysa a komite ti panakacite in contempt ken ti panakaibalud manen ni Roque bayat ti hearing dagiti uppat a komite nga agimimbistigar mainaig iti ilegal nga operasion ti Philippine Offshore Gaming Operators (POGO) ken ti panangpapatay a napasamak iti war on drugs iti Administrasion ni sigud a Presidente Rodrigo Duterte.
Maipalagip a kiniddaw dagiti kongresista nga isubmitir ni Roque dagiti dokumento a mangpaneknek a saan a nagapu iti ilegal nga aramid ti panggadu ti kinabaknang ti pamiliana bayat iti napalabas nga administrasion.
Maibasar iti impormation ti House of representative, ngimmato ti kinabaknang ti pamilia ni Roque iti agarup P3 Million idi 2015 ken nginmmato manen daytoy iti P67.7 Million idi 2018 manipud iti sigud a P125,000 a kinabaknang iti Biancham Holdings ken Trading ti pamilia daytoy.
Immunan nga impasigurado ni Roque mangisubmitir iti dokumento a mangilawlawag iti panagngato ti kinabaknang ti pamiliana.
Nupay kasta, kinunana ni Batangas Representative Gerville Luistro a nangipila ni Roque iti motion tapno maibasura ti subpoena duces tecum nga agkidkiddaw iti nasao a dokumento ken impaganetgetna ti right to privacy daytoy.
