Nagpiansa dagiti sigud nga ehekutibo ti Department of Agriculture (DA) ken Bureau of Fisheries and Aquatic Resources (BFAR) kalpasan a naidarumda iti graft mainaig iti P2.1 billion a kontrata ti vessel monitoring system (VMS).
Da sigud nga Department of Agriculture Undersecretary for Fisheries Eduardo Gongon ken sigud a Bureau of Fisheries and Aquatic Resources director Demosthenes Escoto ket nagpiansa ti sag-P360,000 Antipolo City Regional Trial Court.
Karaman metlaeng kadagiti nagpiansa ket ti padada a naakusaran a ni Simon Tucker, CEO ti British company SRT-UK.
Ti arraignment dagitoy ket inton Enero 22 ken ti pre-trial dagitoy ket inton Pebrero 26.
Pinaglibakan ti Ombudsman ti mosion ni Escoto a mangusig manen iti resolusion a mangidarum kenkuana ken ti dua pay gapu iti panaglabsingda iti Anti-Graft and Corrupt Practices Act, kasta metten ti desision a nangpaneknek kenkuana a guilty wenno nakabasol iti grave misconduct ken nangibilin iti pannakaikkatna iti serbisio.
