BAGUIO CITY – Makibalballaet ita ti pulisya iti Cordillera Region para iti panakaisayangkat dagiti dayalogo iti nagbaetan dagiti addaan ti susik iti nagbeddengan iti daga tapnu nakappia a marisut ti boundary dispute dagitoy.
Kinuna ti Police Regional Office Cordillera (PROCOR) nga inton December 16, aldaw ti Miyerkoles ket agturong dagiti panglakayen ken opisyales ti Butbut, Tinglayan, Kalinga ken Betwagan, Sadanga, Mountain Province iti pagin-inagawan dagitoy a disso.
Panggep daytoy ti panakaisayangkat ti aktuwal nga inspeksiyon tapnu mabigbig ti nagbeddengan dagitoy.
Napagnumuan daytoy iti peace dialogue iti nagbaetan ti dua a tribu a pinasetan ken sinaksian dagiti pulis, militar ken dagiti maseknan nga ahensia ti gobyerno.
Napagnumuan pay a kalpasan a pagnumuan ti dua a tribu ti nagbeddengan dagitoy ket markaan met ti Department of Environment and Natural ti metes and bounds bayat a mangipasdek ti Department of Public Works and Highways iti monumento sadiay.
Mandato met ti Department of Interior and Local Government a mangited ti policy support bayat a ti Department of Agriculture ti mangipaay ti agricultural development iti disso.
