BAGUIO CITY- Nakailista ti Highway Patrol Group (HPG)-Cordillera iti siyam a carnapping incident iti umuna a kwarter ti agdama a tawen.
Iti panakiuman ti Bombo Radyo Baguio, kinuna ni PMaj. Peter Dapliyan, spokesperson ti HPG Cordillera, bin-ig a motorsiklo ti natakaw dagiti suspek.
![](https://img.bomboradyo.com/baguio/2022/04/hpg-car.jpg)
Dinakamatna a saan a grupo wenno sindikato ti suspek iti panakakarnap dagiti motorsiklo no di ket nakursunadaan laeng daytoy ti daduma nga indibidual.
Kinunana a nakarapada iti igid ti kalsada dagiti natakaw a motorsiklo bayat a dagiti daduma ket napanawan laeng iti sumagmamano a minutos.
Manipud iti siyam nga insidente ti carnapping, uppat ditoy ti napasamak saduay Kalinga, dua sadiay Mt. Province ken saggaysa sadiay Benguet, Apayao ken Baguio City.
Impettengna a sipud nangrugi ti pandemya ket bimmaba ti carnapping incident iti Cordillera gapu iti nainget panakaipatungpal ti anti-carnapping operation ken ti nasapa a panagreport ti publiko.