BAGUIO CITY – Makium-uman ita ti lokal a gobierno ti Baguio City kadagiti hotels tapno mangipabulodda dagiti pasilidad dagitoy a temporaryo a pagnaedan dagiti health workers.
Kasaruno daytoy ti kiddaw dagiti health workers iti siudad a maipaayanda iti pagnaedan tapnu saanda a maiyawid ti COVID-19 virus iti pamilya dagitoy.
Tinagiragsak met ni City Administrator Engineer Bonifacio Dela Peña ti boluntaryo a panangidiaya dagti hotels kadagiti pasilidad dagitoy nga agserbi a pagnaedan dagiti health workers.
Inlawlawagna a biyang ti lokal a gobyerno ti gastos wenno abang dagiti health workers kabayatan ti panagtalinaedda kadagiti hotels.
Mainaig iti daytoy, balligi a napaawid dagiti COVID patient a nakakompleto iti isolation dagitoy kadagiti pasilidad tapnu maakomodar dagiti daduma pay a pasyente.
Gapu iti daytoy, nabakantean ti 50 beds ti siyudad sadiay Sto. Nino Isolation Facilty ken manamnama a manayonan pay daytoy iti 50-bed capacity ita nga aldaw.
