BAGUIO CITY – Ad-adalen ita ti Office of the Civil Defense (OCD) – Cordillera ken dadduma pay a maseknan nga ahensia dagiti addang tapno marisot ti parikot nga ituntunda ti agtultuloy a panagreggaay ti daga ken batbato iti masakupan ti Kennon Road sadiay Camp 5, Tuba, Benguet.
Sigun kenni OCD – Cordillera Regional Director Albert Mogol, naduktalanda nga adda ti maysa a naabandona a piggery iti ngato ti bantay a pakasarakan ti dakkel a betak ti daga.
Kinunana a daytoy ti agbalbalin a rason iti agtultuloy a panagreggaay ti daga.
Inaklonna met nga iti agdama ket saanen a kabaelan ti ‘blanketing’ ti kasasaad ti nasao a bantay.
Nupay kasta, dinakamatna a nakikoordinardan iti amin a maseknan nga ahensia para iti napintas nga addang nga aramiden dagitoy.
Naamuan a panggepda a reggaayen ti paset ti bantay agingga a madanun iti disso nga ayan ti dakkel a bettak.
Kinuna pay ni Director Mogol a napigsa metlaeng ti danum nga agtataod iti ngato a paset ti bantay a mangituntunda iti panagreggaay ti daga. (with Bombo Brigitte Marcasi)
