BAGUIO CITY – Naalarma ti gobierno ti South Korea gapu iti panagpositibo ti maysa nga indibidual sadiay a nagturong sadiay Itaewon, ti mabigbigbig a ‘most diverse and foreigner-friendly district’ ti Seoul a sentro ti nasao a pagilian.
Iti report ni Bombo International Correspondent Efren Paday-o, maysa a Pinoy worker sadiay South Korea, kinunana a nagpositibo ti nasao nga indibidual kalpasan a nagturong iti tallo a balay-paginuman sadiay Itaewon.
Nupay kasta, kinunana a saan paylaeng a naduktalan dagiti otoridad ti rason no apay a nakaptan iti coronavirus ti nasao nga indibidual.
Gapu iti daytoy, naiparikep manen dagiti balay-paginuman sadiay nga immunan a naglukat.
Kinuna pay ni Paday-o nga agsublin iti normal ti sitwasyon sadiay South Korea ken aglukat aglukat metten dagiti dadduma nga establishemento iti nasao a pagilian.
Manamnama met a mailukaten dagiti eropuerto ti South Korea inton Hunyo para kadagiti international flights.
Kabayatanna, dinakamat ti Pinoy worker a nagsubli metten iti trabaho dagiti OFWs sadiay nga immunan a napukawan ti panggedan gapu iti COVID-19 pandemic.
