BAGUIO CITY – Nangbukelen ti Apayao Provincial Police Office (PPO) iti Special Investigation Task Group (SITG) a mangimbestigar iti panakapapatay daydi sigud a Flora, Apayao Mayor Richard De San Jose.
Sigun kenni Apayao PPO Provincial Director PCol. Byron Tegui-in, tutukan ken imbestigaran ti SITG ti sigud a bise mayor ken nadutukan nga Indigenous Peoples Mandatory Representative ti FLora.
Kinunana a kabinnadang ti SITG ti Flora Municipal Police Station, ti CIDG-Apayao ken ti Regional Intelligence Unit ti Police Regional Office Cordillera.
Innayonna a kitkitaenda amin a posible nga anggulo iti kaso kas iti gura, pammales, susik iti daga, pulitika ken iti negosyo.
Maipalagip nga idi rabii ti July 28 iti deppaar ti Sampaguita Street, Poblacion West, Flora ket pinalpaltogan dagiti dua saan pay a nabigbig nga armado a lallaki ni De San Jose kabayatan ti panaginomna iti arak ken dagiti kakadwana a construction workers.
Nakita dagiti testigo ti dua nga armado a lallaki a nakasuot iti bonnets, jackets ken camouflage pants ken nakaimetda iti riple ken ababa a paltog iti nakapasamakan ti krimen.
Naitaray pay ti biktima iti pagagasan ngem naideklara a dead on arrival bayat a narekober dagiti pulis iti nakapasamakan ti krimen ti maysa a basyo ti bala ti M16 rifle ken bala ti saan pay a nabigbig a paltog.
