BAGUIO CITY – Agsagsaganan dagiti stakeholders iti industriya ti turismo ditoy siudad ti Baguio iti posible a nakarkaro nga epekto ti panagngato ti kaso ti COVID-19.
Iti panakiyuman ti Bombo Radyo kenni Andrew Pinero, public information officer ti Hotel and Restaurant Association of Baguio, kinunana a kasapulan ita nga agbalin nga agresibo dagitoy iti sales ken marketing.
Sigun kenkuana, nasken a makabukel dagiti hotels ken restaurants iti promotions wenno diaya a makaguyugoy kadagiti umili nga agturong kadagiti hotels dagitoy ken ag-avail kadagiti serbisyo nga ididiaya dagitoy.
Dinakamatna a planoda met a makitaripnong iti Department of Tourism tapnu talantanenda ti recovery plan para iti industriya dagitoy.
Kinuna ni Pinero a namnamaenda nga iti panagngato dagiti kaso ti COVID-19 iti pagilian ket dakkel met ti agbalin nga epekto daytoy iti sektor ti turismo kadagiti masungad nga aldaw.
Sigun pay kenkuana, iti umuna a lawas ti Pebrero ket addan dagiti addang nga inaramid dagiti hotels ken restaurants iti siudad tapnu maipasigurado ti kinatalged dagiti kostumerda kas iti panangiwarasda iti hand sanitizers, panangiyaplikar iti disinfectant iti masakupanda iti 24/7 ken iti panagaramat dagiti front liners iti face mask.
