Naituding a sangapulo ket uppat wenno sangapulo ket lima a precinct sadiay Bakun, Benguet ket agaramat iti Starlink, maysa a satellite internet constellation, para iti umadanin a midterm elections gapu iti parikot a nakapsot a signal sadiay.
Iti panakiuman ti Bombo Radyo kenni Richard Buenaventura, Commission on Elections (COMELEC) Election Officer sadiay Bakun, Benguet, kinunana a ti munisipyo ti Bakun ket talaga napalikmutan iti bambantay rason a saan a nalaka ti koneksyon.
Gapu iti dayta, mangnamnama daytoy nga agballigi ti panakaaramat ti Starlink tapno dagus a maitransmit dagiti resulta wenno dagiti botos dagiti botante.
Malaksid iti nakapsot a signal, maysa pay a karit a napasaranda sadiay Bakun, Benguet ket ti panakaideliver dagiti Automated Counting Machine no sadino kinasapulanda a bagkaten dagitoy gapu ta saan a madalyasat daytoy dagiti lugan kas kadagiti lugar a Sinacbat, Bakun ken daduma pay.
Iti sabali a bangir, imbinglay ni Buenaventura a bassit ti nagbaliwan dagiti bilang dagiti botante sadiay Bakun, Benguet gapu ta kagiddan ti panakaipatungpal ti voters registration ket adda met dagitit botante a nagakar iti pagbotosanda.
