Umaw-awat iti ado a reaksyon ti kinuna ni Senator Imee Marcos a ti Beijing ket addaan plano a mangipatayab iti hypersonic missiles iti military installations ti pagilian.
Sigun kenni Marcos, madandanagan daytoy iti mapatta-patta a missiles a mangtarget iti Enhanced Defense Cooperation Agreement (EDCA) ti Estados Unidos ken Pilipinas.
Nu pay kasta, kinuna ni maritime law expert Jay Batongbacal a ti statement ni Marcos ket spekulasyon laeng ken awan ti kusto a basaranna agsipud ta inalana ti impormasyon iti maysa a report a para kenkuana ket kasla reliable.
Iti sabali a bangir, kinuna ti National Security Council (NSC) ken Department of National Defense (DND) nga awan ti makitkitada a pangta manipud iti pagilian a China bayat a kinuna ti Armed Forces of the Philippines a makikoordinarda kenni Marcos para iti kanayunan a detalye iti nasao a banag.
Kabayatanna, impasigurado ni Department of Foreign Affairs (DFA) Undersecretary Theresa Lazaro nga ar-aramiden amin ti gobyerno ti kabaelanda tapno mapapigsada pay ti “defensive capabilities” ti Pilipinas.
