BAGUIO CITY – Sumagmamanon nga accommodation establishments ditoy Baguio City ti impaayan ti Department of Tourism (DOT) – Cordillera iti Certificate of Authority to Operate iti 50% capacity kalpasan a nakapasa dagitoy iti inspeksion ti ahensia.
Sigun kenni DOT – Cordillera regional director Jovi Ganongan, pakabuklan a 15 a hotels ken inns a nagaplikar para iti nasao a sertipikasyon ti impasidongda iti inspeksion.
Dinayawna met dagiti naobserbaranda a kinasagana dagiti nasao a hotels ken inns a mangsurot ken mangipatungpal kadagiti pagalagadan para iti ‘new normal’.
Maipalagip nga iti pagalagadan ket nasken nga agala dagiti mangididiaya ti akomodasyon kadagiti turista iti sertipikasyon manipud DOR para iti panagtuloy ti operasyon dagitoy.
Inlawlawagna nga iti pagalagadan ti Modified General Community Quarantine ket mabalinen ti 50 percent capacity a panaglukat dagiti hotels.
Nupay kasta, gaputa nakarikep ti Baguio kadagiti turista ket ad-adalendan ti panakaidiaya dagiti programa kas iti staycation kadagiti umili ti siudad tapnu maguyugoy dagitoy nga agturong kadagiti hotels.
Sigun kenkuana, babaen iti nasao nga addang ket saan a matay ti panagnegosyo iti accommodation establishments a dakkel a makatultulong iti ekonomiya ti siudad.
Innayon ni Ganongan a nasken met a maipasigurado nga amin nga accommodation establishments ditoy siudad ket agtungtungpalda kadagiti amin a paglintegan tapnu masalwadan dagiti trabahadorda ken dagiti agbalin a kliyente dagitoy.
