Binabalaw ni Baguio City Mayor Benjamin Magalong dagiti sumagmamano a kongresista a mangar-aramat iti pondo iti gobyerno para iti personal a pagsayaatan dagitoy.
Sigun kenkuana, adda dagiti sumagmamano a kongresista a mangiparparang a nagtaud kadakuada dagiti financial assistance kas iti Ayuda sa Kapos ang Kita Program wenno AKAP ken ti Medical Assistance to Indigent Patients wenno MAIP.
Ngem ti kinapudnona, dagiti lokal nga ahensya ti pagtataudan dagiti ayuda kas iti Department of Social Welfare and Development ken ti Department of Health.
Malaksid iti dayta, dinakamat ni Mayor Magalong a saan nga ibingbinglay dagiti sumagmamano a kongresista ti datus wenno impormasyon maipapan kadagiti benepisyaryo dagiti sumagmamano a financial assistance iti gobyerno.
Gapu iti dayta, kinuna ti mayor a nasaysayaat nu italek lattan kadagiti ahensya ti gobyerno ti panakaipaay dagiti ayuda kadagiti Pilipino tapno maliklikan ti panakaaramat dagitoy para iti personal gains dagiti sumagmamano a kongresista.//Bombo Genzel Depayso
