LA TRINIDAD, BENGUET – Bimmaba ti suplay dagiti highland vegetables kagiddan ti mapaspasaran nga epekto ti El Nino phenomenon idiay Benguet Agri Pinoy Trading Center (BAPTC), La Trinidad, Benguet.
Nupay kasta, agtaltalinaed a nababa ti demand ken presyo daytoy iti agdama bayat ti panakabigbig ti Semana Santa.
Dagitoy ti presyo ti sumagmamano nga highland vegetables iti La Trinidad Trading Post: patatas a sumanon iti P65-70 tunggal kilo; Korean Raddish a P20-P25 tunggal kilo; Bell pepper a P100 tunggal kilo; Broccoli a P30-P40 tunggal kilo; Cauliflower a P45 tunggal kilo; Talong a P50 tunggal kilo; Baguio beans a P50 tunggal kilo; Pipino a 100 tunggal kilo ken daduma pay.
Sigun kenni Agrex Sanio, Benguet vegetable disposer ken farmer, marigatan dagiti mannalon gapu ta saan paylaeng a nagtudtudo.
Innayona pay a marigrigatan dagiti daduma a mannalon gapu ta awan ti daduma a source ti irrigation rason a malaylay dagiti daduma a mula dagitoy.
Nupay kasta, kinunana nga agtultuloy ti panaglakoda agingga inton Biyernes ita a lawas iti namnama-da nga adu ti aggatang kadagiti natengda tapno makasubbot dagitoy.//Bombo Jez Lapizar
