Impasigurado ni Jonathan ti Department of Agriculture- Cordillera RAFIS Information Center, ti umdas a suplay dagiti nateng iti rehiyon Cordillera.
Daytoy ket kasaruno ti panagngato ti presyo dagiti sumagmamano a nateng kas ti kamatis, bell pepper, sili ken dadduma pay.
Iti pannakiuman ti Bombo Radyo kenni Llanes, kinunana a ngimmato ti presyo dagiti nadakamat a nateng gapu paylaeng iti napasaran a nagsisinaruno a bagyo iti napalabas a tawen.
Iti baet dayta, kinunana a manamnama metten nga umado ti suplay daytoy inton sumaruno a lawas agsipud ta adu kadagiti mannalon ti agapit kadagiti mulada.
Kabayatanna, impalagipna met kadagiti mannalon ken mangngalap nga agparehistro iti Registry System for Basic Sectors in Agriculture wenno RSBSA tapno maipaayan dagitoy iti tulong nangruna no adda ti didigra.
Ti Registry System for Basic Sectors in Agriculture ket national registry para kadagiti amin a mannalon ken mangngalap iti intero a Pilipinas kas basaran ti Department of Agriculture para iti programa ken dagiti suporta dagitoy.
Kinunana met a 98% a mannalon ken mangngalap iti rehiyon Cordillera ti nagparehistron iti daytoy.
Gapu iti dayta, al-allukuyenna dagitoy tapno -availda kadagiti pagsayaatan nga ipaay ti Department of Agriculture.
Innayonna pay a no adda man ti agparehistro ket agturong laeng iti local government unit iti lugar dagitoy tapno isuda ti mangisumitir iti opisina ti Department of Agriculture.
