![](https://img.bomboradyo.com/baguio/2019/12/surf.jpg)
BAGUIO CITY – Agtaltalinaed a dagiti surfers ti Pilipinas ti kapigsaan a mangabak iti agtultuloy a surfing competition iti 2019 SEA Games a maisaysayangkat sadiay San Juan, La Union.
Inwaragawag daytoy ni Tip Noventin, head coach ti surfing team ti Indonesia iti interview ti Bombo Radyo.
Kinunana a ti Pilipinas kas host country ket addaan napintas ken dakkel a tsansa a mangabak iti gold medals iti surfing gapu iti homecourt advantage.
Dinakamatna nga ikonkonsiderada a kapigsaan a kalaban ti Team Pilipinas gaputa dagiti surfers ditoy ket ammoda ti beach break, home break ken point break a maysa a dakkel a bentahe.
Innayonna a napigsa metlaeng ti Indonesia, Pilipinas ken Thailand iti level of performance.
Sigun kenkuana, maragsakan ken pagyamyamananda ti panagbagyona iti pagilian gaputa ngimmato ti dalluyon para iti napimpintas a performance.
Maipalagip a sag-uppat a gold ken silver medals ken walo a bronze medals ti paglalabanan dagiti surfers manipud Myanmar, Thailand, Malaysia, Singapore, Indonesia ken Pilipinas iti uppat a kategorya.
Nangrugin ti qualifying rounds ti surfing competition idi Lunes iti kaunaan a gundaway a panakainayon ti surfing kadagiti ay-ayam iti SEA Games.
Kabayatanna, dinayaw ni coach Noventin dagiti organizers ti 2019 SEA Games ken kinunana nga awan ti nagbalin a problema ti bunggoyda gaputa nagbalin a nasayaat amin a tarao, transportasyon, security escort ken akomodasyon dagitoy.